شيبة عرعر يطالب بأن يكون مدير فماهو المكان الذي يرغب أن يكون به مدير .. حوار شيق للممتع شيبة عرعر - صحيفة عرعر اليوم

صحيفة عرعر اليوم


صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم

صحيفة عرعر اليوم





 

الأخبار
شيبة عرعر
شيبة عرعر يطالب بأن يكون مدير فماهو المكان الذي يرغب أن يكون به مدير .. حوار شيق للممتع شيبة عرعر

شيبة عرعر يطالب بأن يكون مدير فماهو المكان الذي يرغب أن يكون به مدير .. حوار شيق للممتع شيبة عرعر

02-04-2011 07:22 PM
شيبة عرعر يطالب بان يصبح مديراً بعرعر وبعد أن عرضت عليه الادارات رفض أغلبها ياترى لماذا ؟؟؟
وماهي نوعية الإدارة التي يرغب بها شيبة عرعر ؟
الإجابة ستكون في دهاليز الحوار الجديد لشيبة عرعر والذي لايغيب إلا ويأتي بالجديد حوار ممتع نرجوه للقراء الكرام :

ياعرعر ، عرعر ، يا عرعر
لبيك ، لبيك . يا شيبة عرعر وش تبي ؟
ابي مدير
وشو ؟
ابي مدير
بسم الله عليك. أكيد الشايب صاير به مس. وإلا. زها يمر مبكر ؟
أي مدير تبيه ياشيبة عرعر؟

أقول لك أنا ابي تعينينني مدير
بعد هالعمر تبي تصير مدير مرة وحده؟
حنا المدير عندنا على طول حتى التقاعد أو الموت أيهما أولا
لا وبعضهم بعد التقاعد يبقى مدير لو انه على بند العمال لأخر لحظه

أقولك يامدينتى الغالية ابي مدير لو سنه
تبي مدير بلديه مثلاً ؟
والله إنك متخلفة ياعرعر هذا المسمى راح مع أهله . الآن يقولون للبلدية أمانه والمدير أمين
المهم تبي تكون أمين ؟
لا . لا. الله يعين الأمين عليكم يا أهل عرعر إن صار شيء شين مسحتوه بالأمين
وإذا سوا شيء زين ما سمعنا له ذكر عندكم
وإذا الامانه طرحت مشاريع قلتوا يبون يأكلون
((أكلكم الدود إن شاء الله))
وإذا الامانه ما طرحت مشاريع قلتوا مقصرين
وإذا وزعوا أراضي قلتم أخذوها أهل الواسطات.
وإذا ما وزعوا قلتم حرمونا
وإذا طاحت بوابة قلتم السبب الامانه
وإذا احد عميانكم طاح بحفرة قلتم أيضا الامانه
وإذا رفع إيجار الاستثمارات قلتم حنا الضحيه ( ما قول إلا الله يعيين الامين عليكم )
طيب وش رأيك بمدير للمجلس البلدي ؟
لا . لا لان المجلس ما عنده صلاحيات
لذلك فهو لا يهش ولا ينش على قولة أساتذتنا ...................
وش رأيك بمدير تعليم ؟
الله يهديك ياعرعر نسيتي يوم أنضرب بالبيض بسبب التعليم والله يعين مدير التعليم
إذا قررت الوزارة مناهج جديدة قلتوا مدير التعليم السبب
وإذا قضى على المدارس المؤجرة وجمعها بمبنى حكومي
قلتم ذلك على حساب التحصيل العلمي بسبب إن المدارس أصبحت الصين الشعبية .
ناهيك عن مشاكل الطلاب وأولياء أمورهم والمعلمين
كلها على رأسه
فانا اعتذر بشدة .
وش رأيك تكون مدير شئون صحية ؟
لا . لا. وألف لا. لأن
إذا وضعت احد حريمكم بعمليه قيصريه قلتم ليه ما تضع طبيعي . وإذا وضعت بنت قلتم ليه ما وضعت ولد . كل هذا بسبب مدير الصحة
وإذا توفى احد أقاربكم قلتم نتيجة خطأ طبي
وإذا أظهرت التحقيقات إن سبب الوفاة طبيعي
قلتم مدير الصحة متعاطف مع موظفيه
وإذا احد الممرضات السعوديات كحلت عيونها وظللت رموشها
قلتم هذا بسبب مدير الصحة
تكفين ياعرعر فكيني من وجع الرأس
طيب وش رأيك بمدير مستشفى ؟
آه ياعرعر تدرين إن سري مقطوع بالمستشفى بس مستشفى التابلاين زماااااان يوم الأطباء أجانب والممرضات لبنانيات آآآآآآآه على ذيك الأيام آآه ثم آآه .
كفي كفي يا شيبة عرعر
تئبريني ياعرعر صايره لبنانيه على غفلة والله إن كلامك باللهجة اللبنانية مثل السرج على البقرة .
اوووه منك ياشيبة عرعر ماينمزح معك. كمل تبي مدير مستشفى ؟
اللي يسمعك ياعرعر بقول عندك مستشفيات الدنيا كلها. وأنت ماعندك إلا اثنين .
الجديد لتاريخه لم تكتمل به الكوادر الفنية. والقديم متهالك وبه مرضى أكثر من طاقته وما به إلا عشر غرف خاصة. وأهل عرعر كل واحد يبي غرفه خاصة . منين أجيب لهم . الرجاء عدم الإحراج .
طيب وش رأيك بمدير محكمه ؟
مدير محكمه قاضي وأنا لست مؤهلاً للقضاء هذا اولاً.
ثانيا لان القضايا اللي تحال لهم كلها قضايا مساكين مثلي أما قضايا اللي عليهم الكلام لا تحال لهم فهم يخرجون من الباب الخلفي بجهات التحقيق .
يقولون ياشيبة عرعر أنهم ينظرون في القضايا ضد الإعلاميين ؟

يامدينتي الغالية قايل لك لا تأخذين كل شيء عن وكالة يقولون
فاللي اعرفه انه صدرت تعليمات سامية بان قضايا الإعلاميين من اختصاص وزارة الثقافة والإعلام .
إلا إن جني المدينة منتقل عندنا ؟!
خلاص لقيت لك اداره بلا مدير ((جامعه الحدود الشمالية)) وش رأيك ؟
يا حليلك ياعرعر من قال لك إن مالها مدير هي لها مدير مع عدم التنفيذ .
و ذكرتيني بقول الشاعر :
يالسعوديه وخلي بخيطاني *** ألف كيلو حايل بيني وبينه
ولهذا السبب جاءت مشاكل لا تعد ولا تحصى ومنها على سبيل المثال لا الحصر :
ـ طلاب كلية الطب بعرعر يعانون من عدم وجود مراجع .
ـ طالبات كلية الصيدلة برفحاء يعانن من تأخر وصول الأساتذة من بداية الفصل الدراسي وعدم وجود مختبرات .
ـ كلية التربية للبنات مسيطرات عليها المتعاقدات بزعامة العميدة والسعوديات من معيدات ومحاضرات وطالبات في خبر كان .
ـ نسمع عن خلافات وتصفية حسابات بين اساتذه الكليات الأخرى .
هذا ما هو طالع على السطح وما خفي أعظم .

وإن شاء الله إذا عادوا أبناءك يا مدينتي الغالية من بعثاتهم في برنامج خادم الحرمين الشريفين (حفظه الله ) والتحقوا بجامعتك كأعضاء هيئه تدريس
هاك الحين أفكر فالأمل معقود عليهم بإصلاح ما افسده بعد الاداره .
آه منك يا شيبة عرعر مدري أي إدارة تبي ؟
ليه قلت بك الإدارات؟ اللي عرضتها عليك هي إدارات حيوية تهتم بي كمدينه وتهتم بالمواطن عندك اعتراض على ذلك ؟
لا يا مدينتي الغالية ما عندي اعتراض وأحب أضيف لذلك بان جميع العاملين بهذه الإدارات وعلى رأسهم مدرائهم هم من نلمس عطاءاتهم ونتائج أعمالهم فهم عاملون ومؤهلون ومتخصصون ولكن نطمع بالمزيد والأحسن .
فإذا مدحتهم فهم يستاهلون ذلك وإذا انتقدتهم رحبوا بذلك فذلك أعلى مستويات العمل الإداري الحديث .
ألان ياشايبنا الفاضل عرفت اللي تبيه. مدير جمعيه خيريه وش رأيك ؟
والله عمل الخير ما احد يرفضه يامدينتي الغالية لكن أنا آبي ارفض العمل كمدير لأي جمعيه خيريه لسببين .
أولهما : بان أهل عرعر عامه والتجار خاصة لا يتبرعون للجمعيات الخيرية عندهم إلا من رحم ربي وهم قلة .
ثانيهما : إذا اجتهد مدير الجمعية وجائت تبرعات من أهل الخير من خارج المنطقة قالوا عنه أهل عرعر. حاميها حراميها .
فتقبلي عذري يامدينتي الغالية .
ياشيبة عرعر تراك حيرتني قلي أي إدارة تبي ؟
يامدينتي الغالية ومن قال لك إني ابي مدير اداره أنا قلت لك ابي مدير ماهو مدير اداره .
أي مدير أرجوك وضح لي أكثر ؟
أنا ابي مدير استراحة .
هالحين صار لك أكثر من ساعة مدوخني وآخرتها تبي مدير استراحة أنا اشهد انك ياشيبة عرعر (( طاب الفيضه ومن اوسع تلاعها ))
وأي استراحة اللي تبيها ؟ لو قلت صالة أفراح اشوى ؟ !

أنا ابي مدير استراحة الشله اللي اسهر معهم .
وش تبي تسوي لا صرت مدير استراحه ؟
ابي اصدر القرارات التالية :
١- منع دخول شيش الجراك و المعسل وجميع أنواع التدخين داخل الاستراحة .
٢- بالنسبة لمواعيد القطه تكون كالأتي :-
أ‌-الموظفين اللي على رأس العمل يوم ٢٥ من كل شهر هجري .
ب-الموظفين المتقاعدين يوم ١٥ من كل شهر هجري .
ج- موظفي الشركات والمؤسسات يوم ١ من كل شهر ميلادي .
٣- فرض رسوم على المسايير من غير الأعضاء لا تقل عن ٢٠ ريالاً للفرد الواحد عن كل ليله .
٤- منع وسائل الترفيه من تلفاز و رسيفر وانترنت وحتى لعب الورق
واستبدالها بالوسائل التالية :-

١- ربابة .
٢- بيه .
٣- عظيم ضاح .
٤- رادو لسماع الأخبار وأم كلثوم فقط .
٥- استبدال دورة المياه من عربي إلى فرنجي علشان إنني أعاني من ركيباتي .

والله يا شيبة عرعر الفاضل إن دروا الشله بان هذه قراراتك يمكن يطردونك من العضوية. ما أقول إلا الله يخلف علينا بك .

تعليقات 27


خدمات المحتوى


التعليقات
#8332 Saudi Arabia [عبدالرحمن العنزي]
02-04-2011 10:02 PM
تبغى مدير استراحة


سهلة



لو تبغانا نسويلك عشر استراحات



ممتع شيبة عرعر


#8333 Saudi Arabia [غالي الأثمان]
02-04-2011 10:56 PM
والله انك لقيتها وش لك بدوخة الرأس بالمسئولية

المسئولين عندنا مدري وش لاقين غير التعب


يارجال مابعد الواحد وهو فاضي لا تعال وقع ولاتعال شف المشكلة هذي



#8336 Saudi Arabia [مدافع]
02-04-2011 11:48 PM
والله يالجامعة امرها غريب



ليه مايتم تعيين مدير لها


حتى الفوضى اللي فيها تنتهي


#8337 Saudi Arabia [عاااااطل]
02-04-2011 11:51 PM
والله لو يعطوني اي شيء لاوافق



ذبحتنا البطالة


مو مدير ابغى اي وظيفة


#8338 Saudi Arabia [ذكريات]
02-04-2011 11:54 PM
عظيم ضاح


الله يذكرك بكل خير




ذكريات



ذكريات



ذكريات





#8344 Saudi Arabia [ليه ياشيبة]
02-05-2011 01:23 AM
الله يعطيك ألف عافية



شاينا الموقر


ليه ماقدمت المباركة

لعرعر اليوم


بمناسبة تصريح وزارة الثقافة والاعلام


ولا التصميم الجديد


#8345 Saudi Arabia [معاند الوقت]
02-05-2011 01:36 AM
حقيقة امتاع في امتاع ونقد لاذع باسلوب ساخر اضافه رائعه لعرعر اليوم


ومن احسن الى احسن ياعرعر اليوم


#8346 Saudi Arabia [مرضي المطرفي]
02-05-2011 01:45 AM
ياشيبتنا وبما انك تبي تصير مدير استراحه انصحك ان توفر لعضاء الاستراحه الي يبونه والا راح يسون مظاهره عند دوار الساعه يطالبون باسقاطك ونفيك لاتقول ماقالي


#8350 Saudi Arabia [الحلم العربي]
02-05-2011 10:29 AM
نسمع عن خلافات وتصفية حسابات بين اساتذه الكليات الأخرى .



صدقت حرب ضروس بالجامعة وتصفية حسابات شيل وحط



#8360 Saudi Arabia [القطــار]
02-05-2011 01:29 PM
شايبنا الفاضل أنت اضافة حقيقة لعرعر اليوم ولعرعر المدينة حوار ممتع وهادف بأسلوب أدبي رفيع وساخر الله يطول بعمرك

الأخ عاطل راجع مكتب العمى قصدي العمل
يقولون يبي يحل مشكلة الطالة حسب ماقرأناه بأحد المواقع الالكترونية


#8363 Saudi Arabia [قناص عرعر]
02-05-2011 06:38 PM
ياهلا بشيبة عرعر الف هلا

طلتك دايماً حلوة


بس


عندي سؤال


وتجاوبني بصراحة


وش رايك بحفر حي الربوة والسيارات اللي تطيح


#8364 Saudi Arabia [شاكر ومقدر]
02-05-2011 06:40 PM
الجامعة

أقرب شيء ينطبق عليها


المال ............


ضايعين مافيه ضبط

لا
بالوظتئف

ولا
بالتحصيل العلمي


#8366 Saudi Arabia [الغلا]
02-05-2011 10:42 PM
شيبة عرعر سؤال صريح




هل سيأتي يوم وتكشف شخصيتك ؟؟؟؟؟


#8367 Saudi Arabia [جامعي]
02-05-2011 11:25 PM
طلاب الطب ناقصهم الكثير ولايوجد اهتمام

وباقي التخصصات فيه نواقص

لابد من اعادة النظر بالجامعة محتاجة لقرارات تنظيمية


الجامعة يسودها الفوضى


#8368 Saudi Arabia [قديمك نديمك ]
02-05-2011 11:27 PM
يازين أيام مستشفى التابلاين ليته موجود



#8369 Saudi Arabia [خالد الرويلي]
02-05-2011 11:29 PM
المجلس البلدي


سامع فيه


أيام الحملات الانتخابية قبل 6 سنوات وهالحين والله ماندري من اللي به


مجلس للفلاشات فقط


#8375 Saudi Arabia [سلمان ]
02-06-2011 10:55 AM
هلا والله بشيبة عرعر



حوار شيق وممتع كعادتك



لاتطول علينا



بأنتظاااااااااااااارك


#8376 Saudi Arabia [عالي]
02-06-2011 11:15 AM
الله يعيطيك ألف عافية ياشيبة عرعر والله انك صادق وش لك بدوخة الراس والإدارات الحكومية


خلك مريح البال


#8377 Saudi Arabia [صحي]
02-06-2011 11:16 AM
مدير مستشفى دايم هو اللي رايح فيها


لو أخطأ ممرض قالوا مدير المستشفى


لو



لو


كل شيء براااااااااااسه



معاك حق


#8379 Saudi Arabia [طيبتي أكبر همومي ]
02-06-2011 12:11 PM
حلوه

حلوه

حلوه

حوار رهيب مع شيبة عرعر على انه يميل للضحك الا ان فيه رسايل موجهه


والله ياعرعر اليوم ذا شيبة عرعر نفسي أتعرف عليه



تقبلو تحياتي


#8388 Saudi Arabia [هدى النذير]
02-06-2011 10:29 PM
هلا بك ياشيبة عرعر


يامدوخ اهل عرعر بسبب عدم كشف اسمك الحقيقي لهم وتساؤلهم الدائم لك عنه


وربما هذا التخفي هو سر كتابتك بحرية بأسلوب مرح يمزج بين الواقع والخيال


لإيصال رسائل بطريقة غير مباشرة والذكي هو من يقرأ مابين السطور ,,,


أنت تحدثت هنا عن المدراء من وجهة نظر الناس ووجهة نظرك كمواطن ,,


وبما أنني مديرة ومن واقع خبرتي أقترح عليك أن تقابل مدراء الإدارات


وجهآ لوجه وتناقشهم شخصيآوتتعرف على هموم إداراتهم والأسرار التي


لديهم وياليت بعدها تتحفنا بحكاية ممتعة منك بلسانهم ,,,



ومبروك لك إدارة الإستراحة ولا تتوقع أن تترتاح بإدارتها



فسوف تصادفك مشاكل كثيرة بس ما وصيك احرص على السعودة بالتوظيف



ترى شبابنا تعبوا من البطالة ,,,,,,,,


#8389 Saudi Arabia [وه]
02-06-2011 10:44 PM
والله يا شيبة عرعر الفاضل إن دروا الشله بان هذه قراراتك يمكن يطردونك من العضوية.


#8391 Saudi Arabia [رائد العنزي]
02-07-2011 12:24 AM
والله ياشيبة عرعر ابيك تصير مدير استراحتنا

مديرنا الحالي ماعندك أحد

كل تاريخ 25 يتصل او يرسل رسائل القطة

يمراسبوع اسبوعين مامن الوالي

والمسيرين اكثر من اعضاء الإستراحة

لا ويجون قبل لاتجي

حوار شيق وجميل من نابغة ومفكر

تحيتي لك


#8392 Saudi Arabia [الفهد]
02-07-2011 12:45 AM
روووووووووووووووووووووعة



ربنا يعطيك الف




عاااااااااااااااااااااااااااااااااااااااااافية


#8394 Saudi Arabia [خلف جويبر]
02-07-2011 02:26 AM
هلا وغلا بشايبنا المحترم

أنا ردي عليك تأخر لظروف سفر وأبي أرد على قضية النظر في قضايا الإعلام كان وكالة يقولون ما تأخذ أخبارك منها خذها من أخوك الصغير شفت جني قاضي المدينة وقرأت عليه قوله تعالى إذا جاء نصر الله والفتح ) وأبشرك صار نظرهم ميه بالميه وأقفلت القضية




حوار ممتع بيض الله وجهك وعندي طلب صغيرون في أمل تكشف هويتك لأني تعبت وأنا أرد على أهالي عرعر وأقول ماعرف


#8399 Saudi Arabia [رحال]
02-07-2011 06:50 PM
اهل عرعر كلهم يبون يصيرون مدراء هي حبكت علية
ان جيت مدارس كل المدرسين يبون مدراء
وان جيت ادارة الكل يسابق ع المدير
صراحة اهل عرعر دون عن المناطق يموتون بحاجة اسمها ادارة
ادارة
اصبحت هااااااااااااااااااااااااااجس اهل عرعر


#14543 Saudi Arabia [ابو سليم]
06-15-2011 04:19 AM

تم التحرير 3


تقييم
5.01/10 (41 صوت)




Powered by Dimofinf cms Version 3.0.0
Copyright© Dimensions Of Information Inc.

صحيفة عرعر اليوم
الرئيسية |الأخبار |المقالات |الصور |البطاقات |الفيديو |راسلنا | للأعلى