12-17-2010 07:33 PM
شيبة عرعر العلامة البارزة بالآونة الأخيرة عبر النقد الساخر واللاذع ... الشايب ذرف دموعه لموقف مر به كذلك ناشد شيبة عرعر سماحة المفتي العام بالتدخل في أمر معين ؟
فماهو الشيء الذي أبكى شيبة عرعر وماهو الشيء الذي جعله يطلب من المفتي العام التدخل لحله جميع هذه الأسئلة تجد الأجابات عليها من خلال حواره الممتع التالي ... قراءه مميزة نتمناها لقراء عرعر اليوم
سـيـارتك ياعشير الــغوش=ســيــارتــك مانـي سـايـمـهـا
الجيب خالي ومابه قروش=والا انــــت تــآخــذ وتـلهـمها
التاير الايمن تقل مفشوش=ومن عند الشاصي محزمـها
افتح كبوته عن الـنـخشوش= ما بـــاقــــي إلا قــوايــمــهــا
إلا الــغـمـاره بها دنــدوش =عن قـولـة مـخـطـي وظـالمها
ما شاء الله اليوم تهيجن ياشيبة عرعر وش السالفه ؟
يا هلا بمدينتي الغاليه عرعر والله يا مدينتي الغاليه اهيجن من ضيقة الصدر من هالزمان الاقشر والحقيقه إن العيب فينا كما قال الشاعر :
نعيب زماننا والعيب فينا*** وما لزماننا عيب سوانا
طيب هات السالفه من الاول للاخر ؟
ذاك اليوم ناداني حفيدي ركوني ( جدو جدو ) قلت جد صوابك وصواب من رباك على ذلك ما تعرف تقولي يابابا عشان ماتجرح مشاعري وتحسسني باني كبير وش تبي ؟
قال تعال تعال ابيك يوم جيته ادار لي اللاب توب وقال شوف هالسيارة القديمه هذه مدفونه بالنفود من حوالي ٣٠ سنه وطلعوها شباب حايل . ويوم شفت الصور لا شعورياً جريت هاك الونه وقامت دموع عيوني يتسابقن على خدودي قال الليد الله يصلحه انا اسف يابابا وقام يحب على رأسي وعلي يدي قلت خلاص ياحبيبي ما فيه شيء بس رح لامك قلها تزين القهوة والشاي وجبهن لي واتصلوا على صديقي ابو بدينه خلوه يجي ويجيب الربابه معه وكان ماصلحها لهالحين خلوه يجيب البيٌه.
الله يهديك ياشايبنا خذ هالمنديل وامسح عويناتك هاللي غورقن . وقلنا وش فيه الزمان الاول والزمان الحالي ؟
كنا في الزمن الاول سعداء وكنا مجتمع متكاتف رغم قساوة الحياة وضنك العيش واكبر همنا اذا تاخر علينا المطر .
كان كبار السن في الزمن الاول يلقون كل احترام والبر من ابنائهم اما الان تلقاهم مرميين في المستشفيات ما احد حتى يزورهم .
تذكرت ايام ورود السيارات الطرائف والعجائب اللي طلعت وقتها ومنها هاللهجينيه اللي سمعتيها بالاول .
يوم شفت السياره تذكرت جودة الصناعه في السابق وقارنتها مع هالتنك في الحاضر .
تذكرت هاك الرجال اللي اصبحوا ميكانيكيين وكهربائيين مابين عشيه وضحاها وهم اميين ولم يلتحقوا لا بمدارس ولا معاهد اوكليات تقنيه .
ما هم شباب اليوم كل شيء متوفر لهم والصناعيه عندنا مستولين عليها الوافدين الله يرزقهم بس ياليتهم ما يغشونا ويستبدلون قطع سياراتنا الاصليه بمقلده .
تذكرت القناعه اللي كان مجتمعنا يتصف بها ما هي الجشاعه التي يتصف بها مجتمعنا الحاضر .
ايه ياشيبة عرعر الحاجه ام الاختراع كمل وش شايف بزماننا الحاضر ؟
آه من الحاضر والله يستر من المستقبل .
الاكثريه من الناس في زماننا الحاضر مشحونه نفسياً بدون اسباب وجشعيين كما اسلفت الى حد القطيعه بين الاقارب بسبب الماده .
اكثر الناس ماهمهم إلا الركض ورى جمع المال باي طريقه ( سرقه - نصب واحتيال – تزويير – رشوة – مخدرات – خيانه – غش – تطفيف – ربا ) وكذلك الركض ورى الوجاهه – لو تراجعين موظف صادر ووارد باحد الاجهزة الحكوميه ويمكن انه على وظيفه بند اجور ما صدر معاملتك الا تجيب له واسطه حتى يبين للناس انه مهم ويكسب معروف على اصدقائه او احد وجهاء المجتمع . حتى المثقفين متقسمين اقسام اللي علماني واللي متشدد واللي فاكها بحري واقصد بذلك اهل الفتاوي اللي ينادي بهدم الحرم والاخر يجيز ارضاع الكبير واللي يدعي بان به مس من الجن لتغطيه افعاله المشينه واللي يحلل الغناء ولا تنسين يامدينتي الغاليه اهل فكر الضلال اللي شوهوا ديننا وسمعة مجتمعنا وكفروا علماؤنا وغرروا بشبابنا الله يخفيهم من الوجود .
ياشيبة عرعر كل اللي ذكرته عن النصف الذكوري وما ذكرت شيء عن النصف الاخر ؟
آه يامدينتي الغاليه هو عندنا نصف اخر عندنا نصف
الزول زوله والحلايا حلاياه *** والفعل ماهو فعل وافي الخصايل
كان في الاول يقولون :
وراء كل رجل عظيم امرأة
اما في الحاضر:
وراء كل تربيه سيئه خادمة
كان في الاول يقولون :
الام مدرسة اذا اعددتها *** اعددت شعباً طيب الاعراق
وفي الحاضر :
الخادمة مدرسة اذا استقدمتها *** تعلم طفلك بوذا والصليب وسوء اخلاق.
(عذراً للغتي العربيه )
كان النساء في الزمن الماضي هن المسؤولات عن البيوت من تربيه وطبخ ورحيل وتنزيل وجمع الحطب وإذا غاب زوجها قامت مقامه باكرام الضيوف . ورعاية شئون الاسرة والحلال .
اما نساء اليوم ماهمهن الا عمليات التجميل شفط شحوم ونفخ ردايف وبراطم كنهن براطم مزايين ام رقيبه .
ياشيبة عرعر يقولون ان الدول اللي ترسل العماله المنزليه يبون يوقفون الاستقدام ؟
يا مدينتي الغاليه قايل لكي من زمان وكالة يقولون اخبارهم غير دقيقه وما تسمعونه هو لي ذراع على طريقة الو اذن البقره واحلب لبن .
وش رايك ياشيبه عرعر ما هي الطريقة اللي تفكنا من هالخادمات ؟
ما فيه إلا طريقه واحده تشترط وزارة العمل على راغب الاستقدام ان يتزوج اللي يستقدمها كان والله ماتشوفين خادمه تدوج عندنا ماسمعتي المثل :
اضرب النساء بالنساء والخيل بالعصا .
ذكرتني ياشيبة عرعر بمهرجان ام رقيبه وش رايك به ؟
صاير مهرجان ( كان )
والله انه قمه التخلف لانه تجاوز الهدف الحقيقي له بما يفعله المشاركين من بذخ وصل الى حد الكفر بالنعمه تصدقين يامدينتي الغاليه إن واحد ذابح مائة قعود من الابل عشا ليله واحده من غير الاغنام ما تشوفين المطر توقف عنا .
وأنني اناشد رجال الدين المخلصين وعلى راسهم سماحه المفتي العام حفظه الله بالتدخل لايقاف هذه المهزله .
اسفه ياشايبنا العزيز ما باركنالك بالسنه الهجريه الجديده اخذتنا بسوالفك ؟
الله يبارك فيك يامدينتي الغاليه (عرعر) وأسال الله العلي العظيم ان يجعلها عليك وعلى سكانك والقراء الاعزاء وعلى كافه مناطق مملكتنا الغاليه سنه خير وبركة وان يكفينا شر كل حسود وان يعيد لنا ملك القلوب بالصحه والعافيه .
ياشيبة عرعر ماهو الشيء الذي فرحت به خلال العام المنصرم ١٤٣١هـ ؟
الشيء الذي افرحني العمل الخيري الذي قام به مجموعة من شبابك ياعرعر المتواجدين بمدينه الرياض من انشاء الجوال الخيري لاهالي المنطقه الله يجعله في موازين حسناتهم . وإذا سمحولي الشباب ان اطلق عليه اسم الهلال الاحمر لعرعر الشمال .
وبهذه المناسبه اود اوضح لاخواني سكان المنطقه بان الاشتراك به لاهالي عرعر المتواجدين بالرياض اما انتم اذا سافرتم للرياض وأحتجتموهم ارسلوا رساله على الجوال تلقونهم مثل رجال الهلال الاحمر السعودي مسافه الطريق ويكونوا عندكم .
كذلك ودي اعتب على كتابنا الافاضل بصحفنا الالكترونيه أين أنتم عن هذا العمل الخيري ؟!
ياشيبة عرعر ماهي نكتة العام ١٤٣١هـ ؟
يقول عبدالعزيز السويد في احيانا :
ان نكته العام المنصرم مدرب منتخب السنوكر اللي انضم كلاعب لمنتخب بلادة ضد منتخبنا وفاز عليه واخرجه من البطوله .
ويقول الدكتور عبدالرحمن حمزه في افاق :
ان نكته العام المنصرم هي سرقة جهاز تصوير القلب التلفزيوني من مستشفى الملك فهد بجدة .
وانا اقول :
ان حفر الصرف الصحي بعرعر اللي طاح بها خمسه اشخاص ولا ماتوا هي نكته العام المنصرم .
عزيزي القاريء اختار على كيفك على طريقه سليمان المانع
((على كيفك اختار هذي سلة اوجاعي )).
34
شيبة عرعر يذرف دموعه !!! ويطالب سماحة المفتي العام بالتدخل 
