وين الرجال أهل الصخا والمواجيب= 	أهل الفعول الطيبة والقديمة


  وين الرجال أهل السيوف المحاديب= 	اللي نواياهم نواي سليمة


وين الرجال اللي بهم نخوة الطيب= 	كرام النفوس أهل العقول الحكيمة


وين الرجال اللي لهم رأي مصيب= 	وين الذي فيهم حشيمة وشيمة


وين الذي فيهم تجوز التراحيب= 	وين الذي فيهم كرامة وقيمة


وين النشاما وين حصن المطاليب= 	وين الرجال أهل الوفا والحشيمة


وين الغيارا وين ستر الرعابيب= 	وين الذي فيهم اقبال وعزيمة


وين الرجال مهونين المصاعيب= 	وأهل الشجاعة والصدور الحليمة


من عقبهم بان الخلل والعذاريب= 	وقام الخصيم اليوم يلعن خصيمة


صارت امور كل ابوها تعاجيب= 	حل المشاكل صار حلة عقيمة


لو صحت بأعلى الصوت مايطلع مجيب= 	اوضاعنا من فعل ايدينا سقيمة


صارت هوايتنا بحش العراقيب= 	هواية صارت بنا مستديمة


والحل اصبح بالقنى والمشاعيب= 	وبالمجتمع كل يوم تطلع جريمة


وشلون بعض الناس ماتنبذ العيب= 	وبعض البشر بالرأي شاور جريمة


وشلون نقبل بالهزيمة وتكذيب= 	وشلون نرضى بالغلط والهزيمة


ماعاد في وقت المذله مواجيب= 	مادام مانملك عقول فهيمة


امورنا تحتاج درس وتهذيب= 	وظلامنا لازم نعالج عتيمة


يكفي دعايات وغرور ومناصيب= 	وجسر التفاهم لازم إنا نقيمة


جمع الشمل والصلح بين الأقاريب= 	هو الأساس الله علينا يديمه


والجمع عز قلوب ناس بها ريب= 	والخير قاموا يرفلون بنعيمه


وترى التشتت يضعف الجمع ويعيب= 	والرجل يرغب بشيء يظيمة


وصلوا عدد ماتطلع الشمس وتغيب= 	على الرسول إعداد صحوه وغيمة